Gjermania: I sëmuri i BE-së sërish

Zgjedhja e Friedrich Merz si kancelar gjerman pranverën e kaluar u paraqit si “shansi i fundit” për partitë tradicionale për të zgjidhur problemet ekonomike, për t’iu përgjigjur shqetësimeve të qytetarëve dhe për të përmbysur rritjen elektorale të partisë së ekstremit të djathtë Alternativa për Gjermaninë.

Vetë Merz kishte paralajmëruar se, nëse kjo dështon, e djathta ekstreme mund të mbizotërojë në zgjedhjet e ardhshme federale. Dje, AfD fitoi bindshëm zgjedhjet në shtetin e Saksonisë-Anhalt, duke i dhënë një tjetër goditje të rëndë autoritetit të Merz dhe qeverisë së tij të koalicionit të madh të Demokratëve të Krishterë (CDU-CSU) dhe Social Demokratëve (SPD).

Në një vit e gjysmë, asnjë nga problemet kryesore të Gjermanisë nuk është zgjidhur. Rritja ekonomike është e dobët. Rendimentet e borxhit dhjetëvjeçar të qeverisë gjermane kanë arritur nivelin e tyre më të lartë që nga viti 2011.

Në vitin 1999, The Economist publikoi një editorial të diskutueshëm duke e quajtur Gjermaninë “të sëmurin e euros”. Njëzet e shtatë vjet më vonë, Gjermania është “i sëmuri i Bashkimit Evropian”. E sëmurë nga palëvizshmëria politike dhe ekonomike.